wrapper

Sport

Sport (33)

Qashqadaryoda sport musobaqalari bo'lib o'tmoqda


2018 yil 25 sentyabr kuni Shahrisabz tumanida 1-oktyabr “O'qituvchi va murabbiylar kuni”ga bag'ishlab vatanparvarlik harbiy sport maktabi o'quvchilari  (2005-2006, 2007-2008, 2009-2010 yillarda tug'ilgan qizlar va o'smirlar) o'rtasida  marafon musobaqasi o'tkazildi.
    Musobaqada Mo'minobod qishlog'i bekati start qismi, Chorshanbe TIP-2 sport inshooti finish qismi etib belgilandi. Musobaqa Shahrisabz tuman Jismoniy tarbiya va sport bo'limi rahbarligi ostida bo'lib o'tdi. Tuman Musobaqada jami 200 (shundan 45 nafari qizlar)nafar yoshlar ishtirok etishdi.
    Musobaqa natijalariga ko'ra:
1-o'rin Shahrisabz tuman vatanparvarlik harbiy sport maktabi
2-o'rin Yakkabog' tumani vatanparvarlik harbiy sport maktabi
3-o'rin Kitob  tumani vatanparvarlik harbiy sport maktab jamoalariga nasib etdi.
Musobaqa ishtirokchilari tuman Jismoniy tarbiya va sport bo'limi hamda vatanparvarlik harbiy sport maktabi rahbariyati tomonidan diplom va esdalik sovg'alari bilan taqdirlandilar.


Batafsil

«Vatanparvar» tashkilotining Qarshidagi avtomobil maktabida yangi chaqirilganlarni qabul qilish tadbiri o'tkazildi

«Vatanparvar» tashkilotining Qarshidagi avtomobil maktabida yangi chaqirilganlarni qabul qilish tadbiri o'tkazildi
        2018 yilning 12 sentyabr kuni O'zbekiston mudofaasiga ko'maklashuvchi “Vatanparvar”  tashkiloti Qarshi avtomobil maktabida II-oqim chaqiriluvchilarini qabul qilish va ochiq eshiklar kuni tadbiri o'tkazildi.
          Joriy yilning 12 sentyabr kuni O'zbekiston mudofaasiga ko'maklashuvchi “Vatanparvar” tashkiloti Qarshi avtomobil maktabida “Vatanparvar” tashkilotining Qashqadaryo viloyati tashkiloti, viloyat Mudofaa ishlari boshqarmasi, Milliy gvardiya, Davlat ta'lim sifatini nazorat qilish inspeksiyasi Qashqadaryo viloyat bo'limi hamkorligida O'zbekiston Respublikasi Qurolli kuchlari uchun harbiy-texnik mutaxassislarini II oqim chaqiriluvchilarini qabul qilish va ochiq eshiklar kuni tadbiri o'tkazildi.
         Hamkorlikda faoliyat yurituvchi tashkilotlar bilan yoshlar va fuqarolar o'rtasida sog'lom turmush tarzini targ'ib etish, yuksak ma'naviy-ahloqiy sifatlarni tarbiyalash borasida ma'naviy-ma'rifiy ishlarni amalga oshirish maqsadida Qarshi shahridagi Nuriston akademik liseyi o'quvchilari hamda chaqiriluvchilarning ota-onalari va oila a'zolari tadbirga taklif etildi.
        “Vatanparvar” tashkiloti o'quv muassasalarida O'zbekiston Respublikasi Qurolli kuchlarga harbiy-texnik mutaxassislar tayyorlash rejasiga asosan 2018-2019 o'quv yilining II-oqimida Qarshi avtomobil maktabi hamda tuman (shahar) Mudofaa ishlari bo'limlari tomonidan100 nafar chaqiriluvchilar saralab olindi. Saralab olingan chaqiriluvchilardan harbiy-texnika mutaxassisliklari bo'yicha 4 ta o'quv guruhlari tuzilgan bo'lib, bulardan:
1)“VS” toifali haydovchi                       -25 nafar
2)“Radiotelefonist”                              -25 nafar
3)“Dizelchi-elektrik”                              -25 nafar
4)“Aloqa liniya nazoratchisi”                -25 nafar
         Tadbirda Mudofaa ishlari boshqarmasidan F.Xusanov, Milliy gvardiyada xizmat qiluvchi kichik serjant R.Boymatov, “Vatanparvar” tashkilotining Qashqadaryo viloyatitashkiloti raisi B.Yazdanov, Qarshi avtomobil maktabi boshlig'i S.Botirov hamda tashrif buyurgan ota-onalar so'zga chiqib chaqiriluvchilarning o'qishlariga va bundan keyingi harbiy xizmatda Vatanga sodiq xizmat qilishlarini vabundan keyingi ishlariga muvaffaqiyatlar tiladilar.
          Tadbirda Milliy gvardiya va chaqiriluvchilarning harbiy ko'rgazmali chiqishlari namoyish etildi.
Kun.uz ma'lumotlari asosida


Batafsil

Yosh atletlar bahslashdi

Qarshi ixtisoslashtirilgan olimpiya zaxiralari maktab-internati manejida sportning engil atletika turi bo'yicha 2003-2004 hamda 2005-2006 yillarda tug'ilgan o'smirlar va qizlar o'rtasida viloyat chempionati o'tkazildi.
Viloyat hokimligi, viloyat jismoniy tarbiya va sport boshqarmasi hamda O'zbekiston engil atletika federasiyasi viloyat bo'limi tashabbusi bilan o'tkazilgan musobaqada150 nafar (shundan 75 nafari qizlar)dan ortiq yosh atletlarimiz munosib ishtirok etdi.
Musobaqada sportchilar 60 metr, 400 metr, 3 ming metrga yugurish, nayza uloqtirish, uzunlikka sakrash, sportcha yurish, balandlikka sakrash bo'yicha o'zaro bellashdilar.
Murosasiz o'tgan bahslarda barcha yo'nalishlar bo'yicha g'oliblar va sovrindorlar aniqlandi. Ularga medal va diplomlar topshirildi.
Dilfuza JUMAYEVA
Qashqadaryogz.uz  ma'lumotlari asosida

Batafsil

MUNDIAL TARIXIDAGI YORQIN QAYDLAR

Yana sanoqli kunlardan so‘ng, aniqrog‘i 14-iyundan futbol bo‘yicha navbatdagi (XXI) Jahon chempionati boshlanadi. Bir oy davomida Rossiya yashil maydonlarida bo‘lib o‘tadigan musobaqada yangi-yangi nomlar porlashi, iqtidorlar kashf etilishi, qaysidir rekordlar yangilanishi mumkin. Bunga qadar esa mundial tarixiga bitilgan eng yorqin rekordlarni yodga olamiz.

ENG KO‘P O‘YIN BOSHQARGAN HAKAM

Bejizga hakamlardan boshlamadik. Chunki, ayni vaqtda futbol bo‘yicha o‘tkazilgan jahon chempionatlari tarixida eng ko‘p o‘yin boshqargan hakam bizning yurtdoshimiz - Ravshan Ermatov hisoblanadi va bu har birimizga yuksak g‘urur bag‘ishlaydi.

U 2010-yilda Janubiy Afrika respublikasi mezbonlik qilgan jahon chempionatidagi ishtiroki bilan dunyoga tanilgan edi. Qat’iy pozitsiyaga ega, o‘yinni oldindan o‘qiy biladigan va uchta tilda mukammal so‘zlasha oladigan Ravshan Ermatovga ushbu mundialda eng ko‘p - 5 ta o‘yin bosh hakamligi ishonib topshirilgandi.

2014-yilda Braziliyada o‘tgan Jahon chempionatiga Ravshan Ermatov tajribali hakam sifatida tashrif buyurdi. Undagi guruh bahslarida Shveysariya - Ekvador, Xorvatiya - Meksika, AQSH - Germaniya uchrashuvlarini yuqori darajada boshqargan hakamimizga chorak finalda Gollandiya hamda Kosta-Rika terma jamoalari o‘rtasida kechgan uchrashuv bosh hakamligi ham topshirildi. Ushbu o‘yin Ravshan Ermatovning jahon chempionatlarida boshqargan to‘qqizinchi bahsi bo‘ldi va bu borada u mutlaq rekord o‘rnatdi. Chunki shu vaqtga qadar hech bir hakam mundiallar doirasidagi 8 tadan ko‘p o‘yinni boshqarmagan edi.

Quvonarli tomoni, Ravshan Ermatov boshchiligidagi hakamlar brigadasi bu yilgi mundialga ham taklif etilgan va ular ayni vaqtda Rossiyada bo‘lib turishibdi. Demak, rekordni yanada mustahkamlash uchun unda imkoniyat katta.

ENG KO‘P ISHTIROK ETGAN JAMOA

Jahon chempionatlarida eng ko‘p ishtirok etgan jamoa - Braziliya termasi hisoblanadi. Pentakampeonlar 1930-yildan buyon o‘tkazib kelinayotgan barcha mundiallar ishtirokchisi bo‘lgan. Shuningdek, mamlakat ikki marotaba ushbu xalqaro musobaqaga mezbonlik qilgan: 1950-hamda 2014-yillarda chempionat aynan shu yurtda bo‘lib o‘tgandi. Qizig‘i, “sariq-yashil”lar o‘zlari mezbonlik qilgan ikkita mundialda ham zafar qucha olishmagan.

ENG KO‘P ISHTIROK ETGAN FUTBOLCHI

Mundialda eng ko‘p ishtirok etish bo‘yicha rekord ikki nafar futbolchiga tegishli: nemis futboli afsonasi Lotar Matteus hamda meksikalik Antonio Karbaxal beshta jahon chempionatida to‘p surgan.

Lotar Matteus 1982-, 1986-, 1990-, 1994-, 1998-yillarda bolib otgan tort yillikning eng muhim turnirida ishtirok etgan bolsa, Antonio Karbaxal 1950-, 1954-, 1958-, 1962-hamda 1966-yillardagi mundiallarda Meksika terma jamoasi darvozasini qo‘riqlagan.

ENG SOVRINDOR JAMOA

Jahon chempionatlari tarixida eng ko‘p sovrin yutish bo‘yicha rekord ham shak-shubhasiz Braziliya terma jamoasiga tegishli. Ular 1958-, 1962-, 1970-, 1994- hamda 2002-yillarda jahon kubogini boshi uzra baland ko‘tarishgan. Shuningdek, yana ikki marotabadan kumush va bronza medallariga ega chiqishgan.

Bosh sovrinlar borasida ikkinchi o‘rin Germaniya terma jamoasiga tegishli. “Nemis mashinasi” shu vaqtga qadar 4 marotaba jahon chempionati oltin medallariga ega chiqqan. Sovrinlarning umumiy soniga ko‘ra esa ular Braziliyani ham ortda qoldiradi. Chunki nemislarda mundialning 4 ta kumush va 4 ta bronza medallari ham bor.

ENG SOVRINDOR FUTBOLCHI

Jahon chempionati kubogini yolg‘iz bir futbolchi - Pelegina uch marotaba qo‘lga kiritgan. U 1958-, 1962-, 1970-yillarda Braziliya terma jamoasi safida chempion bo‘lgan.

Bundan tashqari, jahon chempionati kubogini qo‘lga kiritgan eng yosh futbolchi maqomi ham Pelega tegishli. U 1958-yilda Shvetsiya yashil maydonlarida bo‘lib o‘tgan mundialda bosh sovrinni qo‘lga kiritganida hali 17 yoshda edi.

ENG KO‘P GOL URGAN FUTBOLCHI

Jahon chempionatlarida eng ko‘p gol urgan futbolchi Germaniya terma jamoasi a’zosi Miroslav Kloze bo‘ladi. Aytish joizki, ushbu nemis fuqarosi 20 yoshida ham qurilishda g‘isht teruvchi bo‘lib ishlardi. 21 yoshida esa professional futbolga qiziqib, Bundesliganing beshinchi divizionidagi “Kayzerslautern”ning ikkinchi jamoasiga borib qo‘shilgan. O‘sha vaqtlarda u ustachilik bilan sportdagi faoliyatini birvarakayiga olib borardi. Shunga qaramay, bir mavsumda 11 gol kiritishning uddasidan chiqqan. Ushbu hujumchi uchun raqib darvozasiga to‘p kiritish xuddi g‘isht terishdek oson yumush edi go‘yo. Buni qarangki, vaqt o‘tib Kloze jahon chempionati final bosqichlarining eng yaxshi to‘purariga ham aylandi. U 2002-, 2006-, 2010-, 2014-yillarda bo‘lib o‘tgan mundiallarda 24 marotaba maydonga tushib, 16 ta gol urishga erishgan.

Shuningdek, Kloze Jahon chempionatining bittadan oltin va kumush hamda ikkita bronza medallarini rasmiylashtirib qo‘yishga ham ulgurgan.

To‘purarlik borasida ikkinchi o‘rin esa hozircha Braziliyalik Ronaldoga tegishli bo‘lib turibdi. U uchta Jahon chempionatida 19 marotaba maydonga tushib, 15 ta golni o‘z nomiga yozib qo‘ydirishga erishgan.

ENG CHIROYLI GOL

Jahon chempionatlari tarixidagi eng chiroyli gol borasida futbol muxlislari, mutaxassislar va jurnalistlar o‘rtasida juda ko‘p munozaralar yuradi. Bu maqomga loyiq bo‘lgan gollar ham talaygina.

Biroq yaqinda butun dunyo futbol ishqibozlari orasida o‘tkazilgan so‘rovnomada 1986-yilda Meksika yashil maydonlarida o‘tgan jahon chempionatida mezbonlar terma jamoasi yarimhimoyachisi Manuel Negretening Bolgariya terma jamoasi darvozasiga urgan goli barcha mundiallarning eng chiroyli goli deb topildi.

Manuel o‘sha vaqtda raqib jarima maydoni ichida, himoyachilar qurshovida turgan bo‘lishiga qaramay, jamoadoshlari uzatgan to‘pni ajoyib akrobatik harakat bilan darvozaga to‘g‘ri yo‘llagan edi.

So‘rovnoma natijalariga ko‘ra, braziliyalik Ederning JCH-1982 da SSSR termasi darvozasiga uzoq masofadan urgan goli ikkinchi o‘rinni egalladi.

ENG TЕZKOR GOL

Mundial tarixidagi eng tezkor gol 2002-yilgi musobaqada kiritilgan. O‘shanda Turkiya termasi hujumchisi Hoqon Shukur Janubiy Koreya terma jamoasi darvozasini 11 soniyadayoq ishg‘ol etgan edi.

Bu haqda batafsilroq to‘xtalsak, Yaponiya bilan birgalikda turnirga mezbonlik qilayotgan Janubiy Koreya futbolchilari 3-o‘rin uchun bahsda mundialni yuqori kayfiyatda o‘tkazayotgan Turkiya termasiga ro‘baro‘ keladi. Qiziqarli o‘yin boshlanishi bilanoq Hoqon Shukur koreyslar darvozasiga to‘p kiritib, stadionni sukutga cho‘mdirib qo‘yadi (muxlislarning asosiy qismi Koreya jamoasi muxlislari edi).

Yakunda ham Turkiya futbolchilari 2:3 hisobida g‘alaba qozonib mundialda 3-o‘rinni egallaydi. Janubiy Koreya esa 4-o‘rinda qoladi. Bu hanuzga qadar har ikki terma jamoa o‘z tarixida qo‘lga kiritgan eng yaxshi natija bo‘lib turibdi.

HAM FUTBOLCHI, HAM MURABBIY SIFATIDAGI CHЕMPIONLAR

Ikki nafar shaxs ham futbolchi sifatida, ham murabbiy sifatida jahon chempionligini qo‘lga kiritib, bu borada o‘ziga xos rekord o‘rnatgan. Ulardan biri germaniyalik Frans Bekkenbauyer bo‘lsa, ikkinchisi braziliyalik Mario Zagallodir.

Frans Bekkenbauyer Germaniya terma jamoasi safida futbolchi sifatida 1966-yilda jahon chempionatining kumush, 1970-yilda bronza, 1974-yilda esa oltin medalini qo‘lga kiritgan bo‘lsa, 1990 yilda Italiya mezbonlik qilgan mundialda o‘z mamlakati terma jamoasini bosh murabbiy sifatida maydonga boshlab tushib, yakunda kubokni olib qaytgan.

Braziliyalik Mario Zagallo esa 1958- va 1962-yilgi mundiallarda terma jamoasi safida futbolchi sifatida zafar quchgan. 1970-yilda esa Braziliya futbolchilari aynan uning qo‘li ostida uchinchi marotaba sayyoramizda tengsiz ekanliklarini isbotlashgandi.

Batafsil

ZAMONAVIY SHART-SHAROIT YANGI MARRALARGA QANOT BO‘LMOQDA

Kasbi tuman Bolalar va o‘smirlar sport maktabi tasarrufidagi eski ochiq suv havzasi tubdan qayta rekonstruksiya qilinib, uning o‘rnida zamonaviy yopiq havza barpo etilgani hudud yoshlarini g‘oyat shod etdi, endi ular doimiy ravishda suv sporti bilan shug‘ullanish imkoniga ega.

- Ayni vaqtda suzish havzasida 7 yoshdan 14 yoshgacha bo‘lgan ikki yuzga yaqin o‘g‘il-qiz doimiy mashg‘ulotlar olib bormoqda, - deydi murabbiy Fotima Ochilova. – Basseyn suvni filtrlash, isitish kabi zamonaviy uskunalar bilan jihozlangan. Undagi suv va zal havosi doimo bir xil, mo‘tadil ushlab turiladi.

Havza foydalanishga topshirilganiga hali ko‘p bo‘lmadi. Biroq, bu yerda shug‘ullanayotgan yoshlar allaqachon medallar jamg‘arishni ham boshlab yuborgan.

- Ushbu suzish havzasi ochilganidan so‘ng, birinchilardan bo‘lib mashg‘ulotlarga kelganman, - deydi tumandagi 16-o‘rta maktabning 7-sinf o‘quvchisi Munisa Hasanova. – Qisqa vaqt ichida suzishni o‘rganib, musobaqalarda ham ishtirok eta boshladim. O‘tgan davr mobaynida bir necha marotaba tuman va viloyat birinchiliklarida sovrinli o‘rinlarni egalladim. Xususan, “Umid nihollari” sport o‘yinlarining viloyat bosqichida 3-o‘rinni qo‘lga kiritganim men uchun juda katta natija bo‘ldi. Endigi maqsadim esa O‘zbekiston chempioni bo‘lish, terma jamoaga qabul qilinish va keyin olimpiadada yurtimiz bayrog‘ini baland ko‘tarish.

Ma’lumot o‘rnida keltirib o‘tish joizki, hozirgi vaqtda viloyatimizda 10 ta zamonaviy suzish havzasi ishlab turgan bo‘lsa, shuning 8 tasi yopiq turdagi basseyndir.

Batafsil

YOSH KARTINGCHILAR BЕLLASHDI

Kitob tumanida O‘zbekiston mudofaasiga ko‘maklashuvchi “Vatanparvar” tashkiloti viloyat bo‘limi tomonidan karting sport turi bo‘yicha viloyat birinchiligi musobaqasi o‘tkazildi.

Ta’kidlab o‘tish joiz, so‘nggi yillarda mamlakatimizda ushbu sport turi ham jadal rivojlanib bormoqda. Xususan, “Vatanparvar” tashkiloti hududiy bo‘limlari tasarrufidagi o‘quv-sport texnika klublarida ko‘plab yoshlar karting bilan muntazam shug‘ullanayapti. Ushbu yo‘nalishda tashkil etilayotgan turli musobaqalar esa sportchilar o‘z imkoniyatlarini sinovdan o‘tkazishi, murabbiylarning terma jamoalarga munosib nomzodlarni saralashida muhim ahamiyatga ega bo‘lmoqda.

Bu galgi musobaqa uchta yosh toifasi bo‘yicha - 9-13, 14-17 hamda 18 va undan katta yoshdagilar o‘rtasida tashkil etildi.

Qizg‘in va murosasiz kechgan bahslardan so‘ng 9-13 yoshgacha bo‘lgan bolalar o‘rtasida 1-o‘rin Muborak tumani vakili Azizbek Quvonchevga nasib etdi. 14-17 yoshli sportchilar o‘rtasida esa kasbilik Javohir Jononov shohsupaga ko‘tarildi. Katta yoshdagi sportchilar o‘rtasida muboraklik Farruh Murodovga teng keladigan raqib topilmadi.

Shuningdek, musobaqada jamoaviy g‘oliblar ham aniqlandi. Bu borada Kitob tumani o‘quv-sport texnika klubi 1-o‘rini qo‘lga kiritgan bo‘lsa, Kasbi tumani yosh sportchilari 2-o‘rindan joy oldi. Uchinchi o‘rin esa Muborak tumani o‘quv-sport texnika klubiga nasib etdi.

G‘olib va sovrindorlar tashkilotchilar tomonidan diplom va esdalik sovg‘alari bilan taqdirlandi.

J.QILICHЕV

Suratda: musobaqadan lavha.

Batafsil

Yosh futbolchilar kuch sinashdi

1-4 may kunlari Qarshi shahridagi “Geolog” sport majmuasida umumiy o‘rta ta’lim maktablari o‘quvchilari o‘rtasida futbol bo‘yicha “Charm to‘p” musobaqasining mintaqaviy bosqichi bo‘lib o‘tdi.

Ta’kidlash joizki, mazkur musobaqa O‘zbekiston futbol assotsiatsiyasi tashabbusi bilan joriy etilgan bo‘lib, unda maktab o‘quvchilari 5-6, 7-8 va 9-10-sinf toifalarida ishtirok etishi belgilangan. Taqvim rejasiga ko‘ra, musobaqa tuman (shahar), viloyat, mintaqaviy va respublika miqyosida o‘tkaziladi. Shunga muvofiq, Qarshi shahrida o‘tkazilgan mintaqaviy bosqichda Navoiy, Samarqand, Qashqadaryo va Surxondaryo viloyatlari o‘quvchilari ishtirok etdi.

- Turnirga Navoiy viloyatidan faqat 5-6 sinf o‘quvchilaridan iborat bitta jamoa kelgan bo‘lsa, Qashqadaryo, Surxondaryo va Samarqand viloyatlaridan belgilangan barcha sinf toifalaridagi uchtadan jamoa qatnashdi, - deydi viloyat futbol federatsiyasi mutaxassisi Asror Xo‘jayev. – Bahslar juda qiziqarli va kurashlarga boy bo‘ldi. Murabbiylar, mutaxassislar yangi iqtidorlarni kuzatib borishdi.

5-6-sinflar o‘rtasidagi bahslarda qashqadaryolik o‘quvchilar navoiylik yoshlarni, surxondaryoliklar esa samarqandlik tengdoshlarini ishonchli mag‘lub etib, finalga chiqishdi. Hal qiluvchi bahsda esa surxondaryolik o‘quvchilar 1-3 hisobida g‘alaba qozonib, musobaqaning respublika bosqichi yo‘llanmasini qo‘lga kiritdi.

7-8-sinf o‘quvchilari o‘rtasida o‘tkazilgan musobaqalarda ham finalga ushbu ikki viloyat jamoalari chiqishdi. Nihoyatda qiziqarli kechgan o‘yinda g‘olib nomi penaltilar seriyasida aniq bo‘ldi. O‘ziga xos futbol lotereyasida viloyatimiz vakillari g‘alaba qozondi va musobaqaning respublika bosqichida ishtirok etadigan bo‘ldi.

Qashqadaryo va Samarqand viloyati o‘quvchilari ro‘baro‘ kelgan 9-10-sinflar o‘rtasidagi final ham penaltilar seriyasiga qadar yetib bordi. Bu bahsda samarqandlik yoshlar g‘alaba qozonib, keyingi bosqichda ishtirok etadigan bo‘lishdi.

Ma’lumotlarga ko‘ra, musobaqaning respublika bosqichi 15-18 may kunlari Toshkent shahrida bo‘lib o‘tadi. Unda Qarshi, Jizzax, Farg‘ona hamda Urganch shaharlarida o‘tkazilgan hududiy bosqich g‘oliblari maydonga tushadi.

Batafsil

To‘rt nafar sportchimiz imtiyozli yo‘llanma oldi

    Andijonda 1999-2000-yillarda tug‘ilgan yoshlar o‘rtasida o‘tkazilgan mamlakat chempionatida viloyat terma jamoasi atletlari umumjamoa hisobida ikkinchi bo‘lishdi.

Chempionatning to‘siqlar osha 110, 440 va 3000 metr masofaga yugurish bahslarida Rahmon Itolmasov, Ishoq Bobosharipov, O‘g‘iloy Muzaffarova oltin medallarni qo‘lga kiritishdi.

10 ming metr masofaga sportcha yurish bo‘yicha o‘g‘il bolalar o‘rtasida o‘tgan musobaqalarda Azimjon Nomozov, qiz bolalar ishtirokidagi bellashuvlarda Mohichehra Meliqulovaga yetadigani topilmadi. Shuningdek, disk, yadro uloqtirishda terma jamoamiz a’zolari Nodir Meyliyev hamda Dilshod Tog‘ayev 3-o‘rinni band etishdi.

Qizg‘in o‘tgan estafetali yugurish, uzunlik, uch hatlab va balandlikka sakrash sinovlarida ham viloyatimiz sportchilari yuqori natijalarni ko‘rsatishdi.

Mamlakat chempionati bahslari yakunida faol ishtirokchilar aniqlandi va viloyatimiz terma jamoasi a’zolari Nozliya Ravshanova hamda Rahmon Itolmasov eng faol qatnashchi, deya e’tirof etildi.  

Ta’kidlash joizki, yengil atletika bo‘yicha bahslarda viloyatimiz sha’nini munosib himoya qilgan sportchilar - Ishoq Bobosharipov, Baxtiyor Nurmatov, Azimjon Nomozov va Mohichehra Meliqulova oliy o‘quv yurtiga kirish uchun imtiyozli yo‘llanmani qo‘lga kiritishdi.

Batafsil

DUNYO POLVONLARI SHAHRISABZDA BELLASHDI

Milliy kurashimiz bir necha ming yillik tarixga ega. Qadimiy qo‘lyozmalarda eramizdan oldingi davrlarda ham bu sport turi ommaviy musobaqalar tarkibidan munosib o‘rin olganligi haqidagi ma’lumotlar uchraydi.

Muqaddas zaminimizda tug‘ilib o‘sgan, nomlari afsonayu dostonlarga aylanib ketgan o‘nlab bahodirlar katta davralarda kurash tushib, o‘zbek nomini butun olamga taratgan. Buyuk ajdodimiz Amir Temur ham o‘z askarlari mahoratini sport tadbirlari asosida doimiy oshirib borgani bizga tarixdan ma’lum. Albatta, Sohibqiron harb amaliyotlari oldidan kechgan tayyorgarlik jarayonida odamlarini turli jang san’ati, usullari, xususan, kurash asosida chiniqtirganiga shubha yo‘q.

Mamlakatimiz mustaqillikka erishganidan so‘ng esa o‘zbek milliy kurashi haqiqiy ma’noda yangicha rivojlanish bosqichiga o‘tdi. Ko‘plab an’anaviy turnirlar, xalqaro musobaqalar tashkil etila boshlandi. Bugun dunyoning hamma qit’alarida o‘zbek milliy kurashi bilan muntazam shug‘ullanayotgan sportchilar ko‘pchilikni tashkil etadi. Unga qiziqish tobora oshib bormoqda. Bu Shahrisabz shahrida o‘tkazilgan O‘zbekiston Prezidenti sovrini uchun Amir Temur xotirasiga bag‘ishlangan VII xalqaro turnirda yana bir marotaba o‘z ifodasini topdi.

Turnirning tantanali ochilish marosimida viloyat hokimi Zafar Ro‘ziyev, O‘zbekiston Respublikasi Jismoniy tarbiya va sport vaziri Shoakram Isroilov, Kurash xalqaro assotsiatsiyasi asoschi raisi Komiljon Yusupov o‘zbek milliy kurashi bugun dunyoning barcha mintaqalarida jadal rivojlanib, nufuzi yuksalib borayotganini, jumladan, ushbu sport turi Indoneziyaning Jakarta shahrida o‘tkaziladigan XVIII yozgi Osiyo o‘yinlari dasturlari tarkibiga rasman kiritilgani, Sohibqiron Amir Temur xotirasiga bag‘ishlangan xalqaro turnir “Osiyo olimpiadasi” oldidan qit’amiz kurashchilari uchun muhim tayyorgarlik bosqichi vazifasini o‘tashini ta’kidlashdi va turnir ishtirokchilariga omad tiladilar.

- Bugungi musobaqaning o‘ziga xos ramziy ma’nosi ham bor, - deydi Komiljon Yusupov. - Endigina davlatimiz mustaqillikka erishgan bir paytda, 1992-yilning avgust oyida xuddi mana shu o‘yingohda milliy kurash bo‘yicha birinchi rasmiy turnir o‘tkazilgan edi. Shundan so‘ng, o‘zbek kurashini targ‘ib qilish, dunyoga tanitish bo‘yicha juda katta ishlar amalga oshirildi. Bu sa’y-harakatlar o‘z natijasini ko‘rsatdi. Mana, Shahrisabz yana kurash bo‘yicha yirik, xalqaro musobaqaga mezbonlik qilayapti.

Darhaqiqat, o‘zbek kurashining nufuzi yuksalib, ushbu sport turiga  qiziqish tobora ortib borayapti. Dunyoning turli mamlakatlaridan kelgan sportchilar, mutaxassislar, ommaviy axborot vositalari xodimlarining e’tirofi ham shundan darak.

- So‘nggi yillarda yurtimizda ko‘plab yoshlar o‘zbek kurashi bilan shug‘ullanmoqda, - deydi eronlik polvon Jafar Pahlavoniy. – Shu sport turi bo‘yicha yangi-yangi nomlar kashf etilayapti.  Shahrisabzdagi xalqaro turnirga ham qator sportchilar, murabbiylar va jurnalistlardan iborat kattagina delegatsiya bilan keldik.

Umumiy sovrin jamg‘armasi 50 ming AQSH dollarini  tashkil etgan turnirda dunyoning 30 ga yaqin mamlakatidan tashrif buyurgan uch yuzga yaqin polvon erkaklar o‘rtasida 73, 81, 90 va mutlaq, ayollar o‘rtasida esa 57 va 78 kilogramm vazn toifalarida g‘oliblik uchun bahs olib bordi.

Qizg‘in va murosasiz o‘tgan bahslarda vazn toifasi 57 kilogrammgacha bo‘lgan ayollar o‘rtasida g‘oliblik o‘zbekistonlik Gulnor Sulaymonovaga nasib etdi. 78 kilogrammgacha bo‘lgan vazn toifasida yana bir yurtdoshimiz – Gulnoza Matniyazova g‘alaba qozondi.

Erkaklar o‘rtasida 73 kilogramm vazn toifasida tojikistonlik Behruzi Xodjazoda g‘oliblikni qo‘lga kiritgan bo‘lsa, 81 kilogramm vazn toifasida eronlik Ilyas Ali-Akbari shohsupaga ko‘tarildi. 90 kilogramm vazn toifasida ham Tojikiston vakili – Kamronshoh Ustapiryon g‘olib bo‘ldi.

Mutlaq vazn toifasidagi bahslar ayniqsa, qiziqarli kechdi. Yarim finalda g‘uzorlik aka-uka – Sherali va Ilhom Jo‘rayev bir-biriga ro‘baro‘ keldi. Ilhom akasi foydasiga bahsdan voz kechdi. Sherali Jo‘rayev esa hayajonli kechgan finalda eronlik Jafar Pahlavoniy ustidan g‘alaba qozonib, O‘zbekiston Respublikasi Prezidenti sovrini - 10 ming AQSH dollari bilan mukofotlandi. Shu tariqa Jafar Pahlavoniy ikkinchi, hamyurtimiz Ilhom Jo‘rayev va mo‘g‘ulistonlik Anar Dorch uchinchi bo‘ldi. Ushbu vazn toifasida ikkinchi o‘rin g‘olibi 7,5 ming, uchinchi o‘rin g‘oliblari esa har biri 2,5 ming AQSH dollarini qo‘lga kiritdi.

Jahongir BOYMURODOV

Batafsil

Quvnoq startlar"dan jahon chempionligigacha

Kishi hayotda hech qachon biror marraga shunchaki erishmaydi. Qo‘lga kiritilgan har bir yutuq zamirida o‘z vaqtida to‘g‘ri qo‘yilgan qadam, tirishqoqlik, sabr-toqat bilan yillar davomida qilingan mehnat yotadi.

Qarshi tumanidagi 59-o‘rta maktabning 10-sinf o‘quvchisi, sportning taekvondo turi bo‘yicha jahon chempioni Malika Choriyeva ham bugun erishgan yutuqlarini ana shu jihatlar   bilan bog‘laydi.

- Aslida sportga qiziqishimga jismoniy tarbiya ustozim - Rustam  Suyarov sabab bo‘lgan, - deydi u. - U kishi darslardagi faolligimni ko‘rib, maktab miqyosida tashkil etiladigan "Quvnoq startlar" musobaqalariga qatnashishga undagan. 2010-yilda maktabimizda o‘zbek jang san’ati to‘garagi tashkil etilgach, akam bilan ushbu to‘garakka qatnay boshladik. O‘sha vaqtlardayoq chempion bo‘lishga qat’iy ahd qilgandim. Shu bois mashg‘ulotlarga astoydil kirishdim. Harakatlarim va ustozim Asqar Nikkiyevning ko‘rsatmalari, maslahatlari natijasida dastlab viloyat miqyosidagi musobaqalarda yuqori o‘rinlarni egalladim. Keyin esa ketma-ket 5 marotaba O‘zbekiston chempioni bo‘ldim.

Hayotda shunday insonlar ham borki, qaysi vazifani bajarishni topshirmang, a’lo darajada uddalaydi. Shuning uchun bundaylarga qobiliyatli, iqtidorli, deya ta’rif beriladi. Malika Choriyeva ham qobiliyatli yoshlar sirasidan. U sportning o‘zbek jang san’ati bilan astoydil shug‘ullanib kelib, taqdir taqozosi bilan yo‘nalishini ozgina o‘zgartirdi - maktabdagi boshqa sport to‘garagi - taekvondo ITF bo‘yicha mashg‘ulotlarga qatnay boshlaydi.

Ko‘p o‘tmay ushbu sport turida ham yuqori natijalarni zabt etishga kirishdi. 6 karra O‘zbekiston chempionati, 2 marotaba xalqaro turnirlarning yuqori probali medallari bilan qaytdi. 2016-yilda O‘zbekiston terma jamoasi safiga qabul qilindi. Shu yili Belarusda bo‘lib o‘tgan jahon chempionatida shohsupaning eng yuqori pog‘onasiga ko‘tarildi. 2017-yilda esa unga "Xalqaro toifadagi sport ustasi" unvoni berildi.

Malika Choriyevaning sport sohasida erishgan yutuqlari, mamlakatimiz sportiga qo‘shayotgan hissasi hukumatimiz tomonidan ham munosib e’tirof etildi. Xususan, Prezidentimizning 2018-yil 2-martdagi qaroriga asosan Malika Choriyeva Zulfiya nomidagi Davlat mukofoti bilan taqdirlandi.

- Bu mukofotni Prezidentimiz menga bildirgan ulkan ishonch namunasi deb bilaman, - deydi Malika. - Endi bor kuch va mahoratimni ana shu ishonchni oqlash uchun qaratmoqchiman. Nasib etsa, turli xalqaro musobaqalarda yurtimiz bayrog‘ini baland ko‘tarish, olimpiada chempioni bo‘lish - eng asosiy  maqsadim. Hozirgi kunda esa, ustozim - akam Shohrux Choriyev murabbiyligida may oyida Mo‘g‘uliston poytaxtida bo‘lib o‘tadigan Osiyo chempionatiga tayyorgarlik ko‘rayapman. Ushbu chempionatdan ham   albatta, chempion bo‘lib qaytishni niyat qilganman.

 

Manba: Qashqadaryogz.uz

Batafsil

Manzilimiz


Manzil: Qashqadaryo viloyati, Qarshi shahri, Mustaqillik Maydoni,1
Pochta indeksi:180100
Telefon
: 0(375)221-12-88, 0(375)221-03-81
Faks
: 0(375)221-13-40
Veb-sayt
http://www.qashqadaryo.uz
Elektron pochta
Yaqin jamoat transport to`xtash joylari 
Milliy bank va Mustaqillik Maydoni bekati
Avtomashrut
1,4,5,7,10,18,20,22,23,27,
37,44,462,11,21,37,33

Hozir saytimizda

Bizning saytimizda 214 mehmonlar va ro'yhatdan o'tgan foydalanuvchilar 0

Bosh sahifa

Qabul kunlari

Rahbariyatga murojaat etish

Rahbariyatga murojaat etish

Viloyat hokimligining umumiy bo'limiga murojjat etish (Yangi oynada ochiladi)

Mobil versiya

Mobil versiyaga o'tish

Bog'lanish

Ishonch telefon raqami 
0(371) 200-55-05 
Ishonch telefon raqami reglament
Yagona telefon raqami
0(375) 221-07-60 
Yagona telefon raqami reglamenti

Batafsil>>>

Biz bilan bog'lanish

Sahifa adressi

Maxsus imkoniyatlar

K'orinish

Pastda o'zingizga kerakli parametrni tanlasng
Blue Green Red Radian
Select menu
Google Font
Body Font-size
Body Font-family